Jendartea  Getxo 2018-07-13 11:22

Aiboa eta Alango arteko oinezkoen pasabideak hobetuko ditu Getxoko Udalak

Algortako Aiboa eta Alango auzoen artean oinezkoen pasabideak hobetzeko eta sendotzeko obrak esleitu ditu Getxoko Udalak: metro bikoko zabalera daukaten bideak egingo dituzte eta, zoladura egokitzeaz gainera, zonalde desberdinak behar den legez argiztatzeko beharrezkoak diren argiak ere ipiniko dituzte. Horrela, gune horretako segurtasuna eta irisgarritasuna hobetuko dira (kota murriztuko da, % 6ko inklinazioa baino gutxiago izan dezan).

Aiboa eta Alango arteko oinezkoen pasabideak hobetuko ditu Getxoko Udalak
Aiboako metro-geltokitik gertu doan bidea. © GETXOKO UDALA | Ikusi handiago | Argazki originala

Neguri eta Algorta artean oinezkoentzako konexioa sortzeko planean sartzen da aipatutako proiektua, udal-iturriek zehaztu dutenez. Horretarako, beste "hiri-parke" bat sortuko dute Aiboako goiko gunean, zeinaren bidez Alango eta Konporte kaleetatik metro-geltokira joateko ibilbide irisgarri eta segurua egingo den. Planak beste jarduketa bi barne hartzen ditu: Aiboako metro-geltokia Miguel Beaskoa kaleagaz lotzen duen igogailu berri bat ipintzea Jesusen Bihotza Udal Egoitzaren ondoan, eta inguru horretan dagoen baso-eremua parke legez egokitzea. Proiektua idazteko fasean daude jarduketa biak.

Beste zenbait proiektu gehitu behar zaizkie horiei: hala nola, Alangon laugarren igogailua instalatzea, Alango eta Aiboa artean oinezkoentzako ibilbideak egitea, Iturribarri guneko parkea, eta abar.

Kalkulatu da oinezkoentzako pasabideak egiteko lanek bost hileko iraupena izango dutela, hasten direnetik zenbatzen hasita. Bideei dagokienez, egoera txarrean dauden guneak hobetuko dira eta beste batzuk zolatuko dira. Bestalde, argiztapenari dagokionez, luminariak ipiniko dira pasabideetan, 24 metro bakoitzeko. Aiboako geltokian hasten den bidea Iturribarri guneko pasabideetara egongo da konektaturik.

Aipatutako proiektuaren jarduketa egiteko aurrekontua 490.000 euro ingurukoa da.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa