Getxolanek zabaldu duenez, tailerrean azalduko dute zeintzuk diren enpresan erabil daitezkeen bitarteko digital berriak "segurtasun osoz informazioa partekatzeko eta nabigatzeko". Ikastaroa Inplantalariak zerbitzuaren bitartez eskaintzen dute. Gainera, SPRI Taldea Eusko Jaurlaritzaren enpresa-garapenerako agentziaren laguntza dauka.
Getxoko tailerrean honako enpresa txiki eta ertainek har dezakete parte: merkataritza eta ostalaritzan izan ezik beste edozein sektoretan jarduten duten enpresek, autonomoek eta ekintzaileek. Interesdunek informazio gehiago eskatu edo izena eman dezakete Getxolan udal-erakundeagaz harremanetan ipinita, 944 660 140 telefono-zenbakira deituz edo getxopro@getxo.eus helbide elektronikora idatziz.
Honako gaien inguruan informazioa eskainiko dute tailerrean: enpresek izan ditzaketen balizko zibererasoak; enpresek gaur egun duten segurtasun-maila; zer egin zibereraso bat izanez gero; informazio digitala jakinarazi eta bidaltzeari zein Interneten nabigatzeari dagokienez bermeak ematen dituzten tresnak eta segurtasun-jardunbideak; sistemetara, kontuetara edo wifira sartzeko pasahitz seguruak erabiltzea; hodeian datuak segurtasunez partekatzeko jardunbide egokiak; nortasuna lapurtzea ekiditea; dokumentu sentsibleak modu digitalean sinatzea; eta fitxategi garrantzitsuen segurtasun-kopia programatuak egitea.
Inplantalariak zerbitzuak eskaintzen du teknologia-aholkularitza eraldaketa digitala gauzatzeko, doan. Enpresa-lehiakortasuna hobetzen laguntzeko asmoz, teknologia ezartzen du modu praktikoan, pertsonalizatuan eta neurrikoan; horretarako, Elektronika, Informazioa eta Komunikazio Teknologiak (EIKT) erabiltzen dituzte.