Irantzu Uriarte Garapeneko Lankidetzarako zinegotziak nabarmendu duenez, helburua da kanpamenduetan bizi diren sahararren bizi-baldintzak hobetzea, "autodeterminazio-erreferenduma egitearen zain daudela". Gogoratu duenez, Getxoko Udala senidetuta dago Saharagaz; 1996. urtean, Udalbatzak aho-batez hartu zuen akordio hori.
Onartutako laguntzak hiru atal izango ditu. Lehenengoa Oporrak Bakean ekimenerako da; horren bidez, saharar umeak badatoz uda ematera familia getxoztarrakaz, adingabeen osasuna hobetze aldera; aurten sei mutil eta lau neska etorri dira. Bigarrena Saharako populazio errefuxiatuaren aldeko giza ekintzako proiektu baterako da, oinarrizko elikagaien hornidurako eta kanpamenduetan dauden Hezkuntza Bereziko Zentroen lana indartzeko, besteak beste, jostunen eta aroztegi tailerrakaz. Hirugarrena izango da urteroko karabanarako, saharar errefuxiatuen kanpamenduetara jateko produktuak eta higienikoak eroan ditzan.