Udako jaiak 2018

Bertoko produktuen nekazaritza-azoka izango da barikuan Algortan

San Lorentzo azoka. © GETXOKO UDALA

Abuztuaren 10ean, barikuan, San Lorentzoko Azoka izango da Algortako San Nikolas eta Biotz Alai plazetan. Bertan, 46 ekoizlek 52 saltoki kokatuko dituzte.

Azoka goizeko 10:00etatik 14:30era izango da, Getxoko Kultur Etxeak eta BBK-k antolatuta. Eguerdian, zenbait lehiaketa izango dira: Idiazabal jatorrizko deiturako gaztarena, barazkiena eta landareena. Euskal baserriko produktu tipikoak erosi eta taloak, sagardoa eta bestelakoak dastatu ahal izango dira. Gainera, trikitilarien eta gaitarien taldeek jaia girotuko dute. Algortako San Lorentzo Bizkaiko azoka garrantzitsuenetako bat da; 18.000 lagun hurreratu ohi dira.

22:00etan, Getxoko Biotz Alai abesbatzak jaialdia itxiko du bere izen bereko plazan, urteroko kontzertua eskainiz.