EuskarAbentura Getxon amaitu da

© GETXOKO UDALA

Getxoko Udaleko Euskara zinegotzia den Koldo Iturbek ondo-etorria egin zion EuskarAbentura espedizioari, martitzen eguerdian, Bizkaia Zubia gurutzatu ondoren, udalerrira iritsi zenean. Pasa den uztailaren 1ean Maulen abiatu zen abentura uztailaren 31n amaitu zen, Areetako Andres Isasi musika-eskolan egindako ekitaldiagaz. Denera 110 gaztek (horietatik hiru getxoztar) eta 30 pertsonak antolakuntzan (getxoztar bi) parte hartu dute.

Ondo-etorria eman ondoren, espedizioko kideak zoriondu zituen Iturbek: "Pozik egongo zarete abentura osatu duzuelako. Harro sentitzen gara, berton amaitzen duzuelako eta zuen helburuak partekatzen ditugulako, Getxon euskaraz bizi ahal izateko etengabeko esfortzua egiten ari garelako”.

Done Jakue bideko hainbat ibilbide jarraituz Euskal Herriko zazpi lurraldeak zeharkatu ditu (783 kilometro, horietatik 420tik gora oinez) Euskarabenturak: lurralde bakoitzean euskarak bizi duen errealitatearen berri izan dute gazteek; gazteen arteko sareak sortu dira; ondare material eta inmaterialaren (kulturalak, historikoak, artistikoak, musikalak, kirol arlokoak, herri-mugimenduekin lotura dutenak…) ezagutzan sakondu dute; ingurumenarekiko errespetua eta zaintzaz arduratu dira; eta toki ugari bisitatu dituzte. Berbarako, Ekainberri eta Santimamiñeko kobazuloak, Donemiliaga Kukulako Suso eta Yusoko monastegiak, Done Jakue bidea bera, Orreaga, Añanako Gatz Harana, Albaola Itsas Kultur Faktoria, euskal kostaldeko Geoparkea, Bizkaia Zubia…

Euskarabentura elkarteak antolatu du ekimena, eta horretarako erakunde publiko eta pribatu ugariren babesa eta laguntza izan ditu, horien artean Getxoko Udalarena. Eta horregatik, emandako laguntza eskertu diote elkartekoek Udal honi.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun