Kirolak  Getxo 2018-09-21 14:40

Uribarri Barrutieta Durango Rugby Taldera itzuli da

Joseba Derteano - Anboto.org

Getxo mailaz jaitsi zen aurreko denboraldian. Orain, Getxo eta Durango Nissan Gaursa maila berean dabiltza. Horrenbestez, etxera itzultzea erabaki du Uribarri Barrutietak.

Uribarri Barrutieta Durango Rugby Taldera itzuli da
Joan den uztailean, Barrutietak Basque Teameko beka jaso zuen. © BASQUE TEAM | Ikusi handiago | Argazki originala

"Lagunakaz eta etxeko jendeagaz jokatuz errugbian gozatu egin gura dut", azaldu du errugbilari gazteak. Izan ere, Getxon entrenatzea, Espainiako selekzioagaz munduan zehar bidaiatzea eta helburu handien presiopean aritzea nekagarria suertatu daiteke batzuetan. Aurten beste era bateko ingurua bilatzen du. Hala ere, taldeagaz zein bere kontura beti bezain gogor entrenatzen jarraituko duela dio.

Zapatuan, 15:00etan, hiru talde batuko dituen triangular batean jokatuko du Durangoko Arripausueta zelaian. Hiruetako bat Barrutietaren talde ohia da, Getxo. El Salvador taldeak osatuko du hirukoa.

Arrastian, 18:00etan, gizonen talde nagusiak El Salvador taldearen kontra jokatuko du Ohorezko B Mailako ligako neurketan.

[Artikulu hau Joseba Derteanok idatzi du ANBOTO.ORG-en eta cc-by-sa lizentziari esker argitaratu dugu HIRUKAn]

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa