Ingurumena  Getxo 2018-10-11 09:07

"Mugi zaitez Getxotik" erronkak baditu irabazleak!

"Mugi zaitez Getxotik" erronkak modu jasangarrian ibilitako 3.851 kilometroko balantzea utzi du. Ekimen hori Getxoko Ingurumen Arloak joan den irailean Europako Mugikortasun Jasangarriaren Astearen barruan sustatutako txapelketa izan da.

"Mugi zaitez Getxotik" erronkak baditu irabazleak!
Sari banaketaren irudia. © GETXOKO UDALA | Ikusi handiago | Argazki originala

Erronka horren helburua da garraiobide jasangarrien erabilera bultzatzea; eta horretarako, garraio publikoan 80 kilometro, bizikletan edo patinetan 40 kilometro edo oinez 20 kilometro egin behar ziren, irailaren 16tik 30era bitartean.

Erronkan aktiboki parte hartu zuten 65 pertsonatatik, 53k gainditu zuten, gehienak neurrian gaindika. Ibilitako 3.851 kilometroetatik, 1.573 oinez egin zituzten, 1.037 bizikletaz eta 1.241 garraio publikoan.

Modu jasangarrian egindako kilometro horiei denei esker 653 kg CO2 ez dira isuri, bide hori gasolina edo gasoliozko ibilgailu pribatu batean eginez gero isuriko zenaren besteko kopurua.

Zozketa eta sari banaketa

Pizgarri gisa, parte-hartzaileek puntuak (zikloak deitutakoak) irabazten zituzten ibilitako kilometro bakoitzeko: ziklo 1 garraio publikoan egindako kilometro bakoitzeko, 2 bizikletan edo patinetan egindakoagatik eta 4 ziklo oinez egiteagatik. Gutxienez 80 ziklo lortu zituzten parte-hartzaile guztien artean lau sari banatu dira zuzenean. Saria jaso duten pertsonak honako hauek dira:

  • Cristian Fernández, 4k Sport Cam kamera urperagarria.
  • Xabi Vela, bizikletarako zakutoak.
  • Cristina del Rosario, 2 lagunentzako afaria.
  • Silvia Civera, 2 lagunentzako Spa eta Masajea.

Bestalde, lortutako ziklo edo puntuen ordez beherapenak eskuratu ditzakete parte-hartzaileek, ekimen horretara atxikitako saltoki eta enpresatan.

Gainera, Mugikortasun Asteko "Konbinatu eta Mugitu!" argazki-lehiaketan lanak aurkezteko epea amaituta, bizikleta tolesgarri bat zozkatu da parte-hartzaileen artean. Bi garraiobide jasangarri desberdin erabiliz argazkiak bidali behar ziren. Saria jaso duen pertsona Josu Yañez izan da.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa