Jendartea  Getxo 2018-11-05 08:58

Komun publikoak instalatzeko kreditu gehigarria onartu du Getxoko Udalbatzak

Bizkaia Zubiko plazan (Areeta), Gernika parkean (Neguri) eta San Inazio parkean (Algorta) komun publikoak instalatzeko 327.000 euroko kreditu gehigarria onartu du Getxoko Udalbatzak.

Komun publikoak instalatzeko kreditu gehigarria onartu du Getxoko Udalbatzak
Besteak beste, Algortako San Inazio parkean jarriko dituzte komun publikoak. | Ikusi handiago | Argazki originala

Aipatutako parkeetan ezarriko dituztenez gainera, gaur egun honako toki hauetan daude komunak: Aixerrotako pasealekuan; Areetako kaiaren pasealekuan, La Bola hondartzaren parean (hura berrituko dute, 160.000 euroan); San Nikolas plazan; Ereagako turismo bulegoko eraikinean; Bolueko landetan; eta Areetako hondartzan (bertan dagoena aldatu egingo da, eta lizitazio-prozesuan dago aldaketa).

Komunak ezartzeko irizpide gisa, 92.000 euroko inbertsioa kalkulatu da ale bakoitzeko (eraikinetan daudenak izan ezik); gainera, toki bakoitzeko mantentze-zerbitzu integrala 3.000 eurokoa da urtean, gutxi gorabehera.

Bide publikoko komunak modernizatzeko emango den beste urrats bat da hori; talde politikoek bat egin dute eskaera hori egiteko, eta adinekoakaz "atsegina den hiri bihurtzeko xedea" daukan Getxo Lagunkoia proiektuak proposatu du hori, baita parte hartzeko zenbait prozesuk ere.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa