Kultura  Getxo 2018-11-05 09:10

Zientzia nagusi izango da egunotan Begoñako galerietan

Azaroaren 7tik 10era, EHUk antolatutako Zientzia, Teknologia eta Berrikuntza Astearen agertoki izango dira Begoñako galeriak. Aurten, tailer didaktiko eta parte-hartzaileak egingo dira, galeriak berreskuratu eta haien balioa nabarmentzeko lanean ari den euskal unibertsitate publikoko ikerketa-taldearen eskutik.

Tailerrak jende guztiarentzat egongo dira zabalik, gaztelaniaz eskainiko dira, ordubeteko iraupena izango dute eta 30 pertsona onartuko dira taldeko. Azaroaren 7, 8 eta 9an (eguazten, eguen eta barikuan) 17:30ean emango dira eta 10ean (zapatuan) 12:00etan. Topagunea Arriluzeko kaiko bisitarien gunearen ondoan dagoen galerietako sarreran izango da.

Tailerrak "landa-bisitaldi" baten erara antolatuko dira, zer egiten duten ikusi, galdetu, ezagutu, argazkietan jaso eta esku-hartzea bermatuko diena parte-hartzaileei. Tailer horietan, honako gai hauek aztertuko dira: "Tren geologikoa. Paisaiaren aldaketa fisiko handiak bertatik bertara. Nola heldu gara honaino?"; "Bastidaren erronka handia. Nola jokatzen du arkitekto batek toki benetan zailean eraikinik eder eta iraultzaileena egiteko eskatzen diotenean?"; "Kimikak nola hondatzen dituen eraikinak eta gure habitatak"; "Elkarregaz horma-irudi bat egitea, Begoñako historia ederra eta bertako areto nagusia islatzeko. Punta Begoña berreskuratzea getxotarrentzat eta bisitan datozenentzat"; eta "Zientzia Punta Begoñan, Sarearen esperientziak", non parte-hartzaileek argazkitan jaso ahalko duten zientziaz beteriko eguna eta sare sozialetan partekatu.

2018/11/07 - 2018/11/10

Begoñako galeriak Getxo

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa