Politika  Getxo 2018-11-29 12:48

Biharko omenaldian "biktima guztiak" kontuan hartuko ez direla deitoratu du Getxoko EH Bilduk

Getxoko Udalak terrorismoaren biktima "guztien" omenezko urteko ekitaldia egin du bihar, barikuan. EH Bilduk iragarri duenez, ez dute ekimen horretan parte hartuko, ezta kaleratutako adierazpenagaz bat egingo, hori EH Bildu Osoko Bilkuraren parte ez zenean onartu zelako eta "ez duelako ordezkatzen gaur egungo ez Osoko Bilkuraren ahotsa ezta egun bizi dugun egoera ere". Era berean, "indarkeria mota guztiek eragindako biktima guztiak" aintzat hartu beharra dagoela aldarrikatu dute.

Biharko omenaldian "biktima guztiak" kontuan hartuko ez direla deitoratu du Getxoko EH Bilduk
Terrorismoaren biktimei 2017an egindako omenaldia. © GETXOKO UDALA | Ikusi handiago | Argazki originala

Koalizio abertzaleak berriro deitoratu du EAJk "ezentzunarena" egiten diola euren aldarrikapenari. Izan ere, akordio zabalagoa lortzeko bidean ipini beharrean, "2009an alderdi soil batzuekin egindako akordioari gogor heldu dio, eta bestelako akordio posibleak baztertu". Gogoratu dutenez, alkateari behin baino gehiagotan akordioa lantzeko eskatu diote, "baina gure eskariari muzin egin dio".

EH Bilduren aburuz, "ezinbestekoa da memoriaren eta biktima guztien errekonozimenduan aurrerapausoak ematea. Horretarako, 2009an erdietsitako akordioari iraungitze data heldu zaiola deritzogu. Uste dugu garaia dela bestelako aurrerapauso batzuk emateko, eta akordio zabalagoak lortzeko".

Iragarri dute aurrerantzean prest egongo direla gaiari berri heltzeko, akordio zabalagoa lortzeko eta biktima eta min denak aitortuak izan daitezen. Bitartean, ekitaldi horretan parte hartuko ez dutela azaldu dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa