Hiru getxoztar omenduko ditu Euskal Tenisaren Galak

Euskal Tenis Federazioaren zuzendaritza-taldea iaz, Euskal Tenisaren Galaren aurretik. © ETF

Datorren zapatuan, abenduak 15, euskal tenislaririk onenak batuko dira Algortako Fadura kiroldegiko areto nagusian, 18:00etan, Euskal Tenis Federazioak (ETF) antolatutako galan parte hartzeko. Ekitaldian, gorazarre egingo diete Álvaro González, Igor Del Busto eta Jorge Camiña getxoztarrei, besteak beste.

Denera, tenisean ibilbide oparoa egin duten zazpi kirolariri, klubi eta kirolzaleri egingo diete omenaldia. Honakoak dira goraipatuko dituztenak:

  • Álvaro González Getxoko Kirol zinegotzia eta errugbilari ohia, "Getxoko tenisari, eta oro har Euskadikoari, emandako laguntza etengabea eta erabakigarriagatik".
  • Igor Del Busto, Euskal Tenis Federazioko presidentea eta Jolasetako tenis-klubaren zuzendaritzako kide ohia, "euskal tenisaren alde egin duen lan bikainagatik, tenisa defendatzen eta klubak, teknikoak, epaileak eta jokalariak baldintza barik babesten".
  • Jorge Camiña, munduko tenis-txapelduna, 70 urtez gorakoen mailan, "2018an, lortutako emaitza ezin hobeengatik".
  • Elias Sagarminaga, munduko tenis-txapelduna, 80 urtez gorakoen mailan, "2018an, lortutako emaitza ezin hobeengatik".
  • Anne Mintegi, Espainiako tenis-txapelduna, kadete-mailan, "2018an, lortutako emaitza ezin hobeengatik".
  • Carlos Ruiz de Ocenda, tenis-epailea, "Estatuko zein nazioarteko epailetzan izan duen aparteko karreragatik, aulkiko epaileren eta marrazainaren arduretan, eta beti agertu duen aldarte eraikitzaileagatik eta Arabako eta Euskadiko tenisa babesteagatik".
  • Donostiako errege-tenisaren kluba, "Euskadiko tenis-klubik zaharrena, euskal tenisari egindako ekarpen garrantzitsuagatik eta 114 urtean egin duen aparteko ibilbideagatik, lehiaketa- eta formakuntza-jardueran eta denentzako tenisaren aldeko apustua eginez.

Halere, horiek ez dira Galan banatuko diren sari bakarrak; euren oroigarriak jasoko dituzte Euskadiko Txapelketako, Hego Euskal Herriko, Errioxako eta Kantabriako VNRC Txapelketako eta Iparreko Zirkuituko  irabazleek.

Gainera, Galaren aurretik hainbat jarduera izango da Faduran. Goizeko 10:00etan, tenis-epaileek euren buruak birziklatzeko zortzigarren mintegia izango dute; hala, "Juez de silla, otra forma de ver el tenis" berbaldia eskainiko du Jaume Campistol Nazioarteko Tenis Federazioaren urre-mailako aulkiko epaileak.

Goizeko 11:30ean, berriz, entrenatzaileen mintegia hasiko da, Gonzalo López Faberok azalduko duen "Desarrollo de la táctica desde la iniciación a la competición" ponentziagaz; Lópezek munduko 100 tenislari onenetako batzuk entrenatu ditu: Julian Alonso, Temur Gabashvili, Ecgeny Donskoy eta Jesse Levine. Ondoren, 12:45ean, Pancho Campo tenis-jokalari profesional ohiak berba egingo du, "Gestión del estrés y entrenamiento mental" gaiaren gainean; Campok Andre Agassi, Stefan Edberg, Barack Obama, Al Gore eta Sting-agaz lan egin du, besteak beste. Entrenatzaileen mintegia 14:00etan amaituko da, Igor Del Busto ETFko presidentearen parte hartzeagaz.

Epaileen eta entrenatzaileen mintegietan egon ahal izateko aurretik izena eman beharra dago, honako posta elektronikora mezua bidaliz: fvascatenis@fvascatenis.net. Ordaindu ere egin beharra dago, baina momentuan egin ahal izango da hori. Diru-kopuruak 10 eta 30 euro bitartekoak dira, gura den berbaldi-kopuruaren eta norberaren lizentziaren arabera.

Era berean, 16:00etan, Euskal Tenis Federazioaren Zuzendaritza bilduko da.