Hizkuntza-gaitasun handitzea eta erabilera sustatzea, horra hor aurkeztutako planaren helburu nagusiak, Getxoko Udalaren esanetan. Koldo Iturbe Euskara Zinegotziaren esanetan, aurreko urteetan arrakasta eduki duten ekinbideak errepikatu eta berriak sortuko dira laugarren sustapen-plana aplikatzearen ondorioz.
"Lehentasuna emango diegu ume eta gazteen aisiari, guraso gazteei, administrazioaren proaktibotasunari eta kultur espazio berrietan euskara ohiko hizkuntza izateari", nabarmendu du Iturbek aurkezpenean. Azaldu duenez, IV. Sustapen Planak aurrekoen ildo bera jorratuko du, eta 140 neurri aurreikusten ditu, hamaika esparrutan: familia, irakaskuntza, helduen euskalduntzea, kultur artekotasuna, administrazioa, aisialdia, kirola, lan-mundua, kulturgintza, komunikabideak eta teknologia berriak.
III. Planaren betetze-maila, %79koa
IV. Plana aurkezteaz batera, Getxoko Udalak jakinarazi du III.ean (2013-2017) aurreikusitako 285 neurrietatik 227 burutu direla, hau da, %79. Adierazi dutenez, betetze-mailarik altuena euskararen transmisioagaz lotutako neurrietan lortu da, eta txikiena kulturgintzaren, hedabideen eta teknologia berrien alorretan.