109,7 milioi eurokoa da Getxoko 2019ko aurrekontu luzatua

EH Bilduk salatu duenez, "Udal-Gobernuak ez du aurrekontuak negoziatzeko asmorik". Alderdiaren ustez, "EAJk eta PSE-EEk gehiengoa balute bezala jokatzen dute, horrela izan gabe".

Getxoko Udalak adierazitakoaren arabera, 109, 7 milioi horietatik, Aurrekontu Luzatu Bateratuarenak dira 101 (Udala, haren erakunde autonomoak eta El Abra-Getxo Kirol Portua Sozietatea), eta aurrekontuaren aldaketei dagozkie gainontzeko 8,7 milioiak, udal-aurrizkiaren kargura. "Gizartearen eta ekonomiaren egungo errealitatera egokitutako aurrekontuak" direla azpimarratu du Udal-Gobernuak.

Aurrekontu Luzatu Bateratuaren 101 milioi euroak honela banatu dituzte: Udala (77.522.803 euro), Getxo Kirolak (8.284.524 euro), Kultur Etxea (6.667.132 euro), Udal Egoitza (5.545.237 euro), Musika Eskola (2.680.332 euro) eta El Abra-Getxo Kirol Portua Sozietatea (377.400 euro). Aurreikusitako inbertsioen artean, ondorengoak nabarmendu dituzte: Algortako Manuel Gainza plazako aparkalekua (3.900.000 euro), mantentze-lanak (3.080.000 euro), ezponden egokitzea (300.000 euro), kirol-instalazioen modernizatzea (1.250.000 euro), ikastetxe publikoetako mantentze-lanak (215.000 euro), igogailu eta arrapala-mekanikoak (800.000 euro), etxebizitzaren sustapena (3.000.000 euro). 

"EAJk eta PSE-EEk ez dituzte aurrekontuak negoziatu nahi"

EH Bilduk azaldu duenez, gobernu-taldeak urrian aurkeztu behar zuen aurrekontuen aurreproiektua, eta abenduan aurkeztu du. "Bilerara deitu ziguten eta negoziatzeko gure gutxieneko demokratikoa jarri genuen mahai gainean; lehenik eta behin, akordioa egon ala ez egon aurrekontuak Osoko Bilkuran eztabaidatu behar direla" dio EH Bilduk. Horri beste eskaera bat gehitu zioten: alkateak ere eztabaida demokratiko horregaz konprometitzea. 

Negoziatzeko saioak egin ondoren, Udal-Gobernuak "benetako negoziaketarako" asmorik ez duela salatu du alderdiak: "Itxurakeri hutsean aritu izan dira, eta ari dira". Azaldu dutenez, erantzuna jaso dutenean jakin dute EAJk eta PSE-EEk ez dutela aurrekontuak Osoko Bilkuran eztabaidatzeko konpromisorik hartu gura, eta ez dutela alkatearen konpromisoa "bermatu" gura. Koalizio abertzalearen ustez, "gutxieneko demokratikoak dira horiek".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun