Gaur aurkeztu dute, Gasteizen, Korrika Kulturala. Iragarri dutenez, ehunka ekitaldi izango dira Euskal Herri osoan, baina sei nabarmendu gura izan dituzte. Horietako bat Getxon izango da, martxoaren 30ean: Beñat Krolem artistak sortutako Oholtza performance-a, Jone Uria eta Jon Martin bertsolarien laguntzagaz bat-batekotasuna modu berezian lantzen duena.
Oholtza ikuskizunean, bertsolarien gorputzakaz (baita bereagaz ere), LED-argiakaz eta hainbat materialetako piezakaz jolasten da egilea, bat-bateko eskulturak sortzeko. 2015ean hasi zuen Beñat Krolemek inprobisazioaren gaineko proiektua; 2017an doktorego-tesia ere hasi zuen, horretan oinarrituta.
Emanaldiaren unean bertan proiektatzen, diseinatzen eta muntatzen dira egiturak, bertsolariek (Jone Uria getxoztarrak eta Jon Martin oiartzuarrak) kantatu bitartean. Aldi berean, haien gorputzak modu konkretuan kokatuko dira. "Bertsolarien eskulturizazioa izango da haien hitzen oinarria eta bertsoaren elikagaia", azaldu dutenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
