Jendartea  Getxo 2019-02-21 12:30

Fadura berritzeko aurreproiektua aurkeztu du Udalak

Kerman Santiago Alkorta

Fadura kiroldegia berriztuko duela iragarri du Getxoko Udalak. Futbol eta errugbi udal estadio bat eraiki, estalitako instalazioak hobetu eta barne-egiturak handituko dituztela adierazi dute, besteak beste.

Fadura berritzeko aurreproiektua aurkeztu du Udalak
Argazkia: KERMAN SANTIAGO | Ikusi handiago | Argazki originala

Gutxienez 6.000 jesarleku edukiko dituen estadioa eraiki gura dute, bertan talde nagusien futbol eta errugbi partidak joka ditzaten udal-taldeek. Gainera, Gobela ibai ondoan parke publikoa egingo dute, baita gaur egun garagardotegia dagoen tokian “erabilera anitzeko eraikina” jaso ere.

Halaber, irisgarritasuna eta erosotasuna hobetuko dute; igerilekuko berdeguneak handitu, eta Bolue futbol zelaietan aldagela berriak eta estalitako harmailak egingo dituzte.

“Getxo Kirolak-ek zuzendutako lan horren guztiaren emaitza oso sendoa da, eta Faduraren aldaketa guztion arteko adostasun handinarekin egiteko oinarriak finkatu ditu”, esan du Imanol Landa Getxoko alkateak.

Bestalde, Álvaro González Kirol zinegotziak adierazi duenez, “asmoa ahalik eta arinen” hastea da: “Hurrengo erronka aldaketa arkitektoniko nagusien lehentasunak zehaztea eta kudeaketa hobekuntzarako proiektuen egutegia sortzea da”. Horrez gain, azpimarratu du lanek “kiroldegia normaltasunez erabiltzeko gatazkak” ekarriko dituztela.

1.900 ekarpen

Getxo Kirolak-ek antolatutako Thinking fadura partaidetza-prozesuan 1.900 ekarpen bildu dituzte, eta 1.600 pertsonak hartu du parte. “Estalitako padel eta tenis pista gehiago nahi dituzte bazkideek”, esan dute udal-iturriek. Iradokizunen artean Fadura kirol-parke publiko bihurtzea ere badago.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa