Ehunka lagun Greenpeacek Ereaga hondartzan antolatutako plastiko-bilketan

©GREENPEACE

"Zoritxarreko plastikoa" lelopean egin dute jardunaldia. Ekimenagaz bat egin dute Ekologistak Martxan elkarteak, Lurgaia Fundazioak, Nasti de Plastic Bizkaiak eta Surfriderrek.

Ehunka lagun bildu dira domekan Ereaga hondartzan, Greenpeace Gobernuz Kanpoko Erakundeak (GKE) Getxoko Udalaren babesagaz antolatutako jardunaldian parte hartzeko. Plastikoek eragiten duten kutsadura murriztea da ekimenaren helburua, baita itsasoan dagoen plastiko kopuruaren gaineko informazioa zabaltzea ere, "itsas-animalia eta gizakion osasunerako arriskutsua baita".

Goizeko 10:00etatik 15:00etara bitartean egin dute plastiko-bilketa. Horrez gain, birziklatzearen eta erabilera bakarreko plastikozko ontzien kontsumoaren gaineko tailer hezitzaileak egin dituzte. Informazio-gune bat ere ipini dute, aipatutako jardueretan parte hartu duten lagunak artatzeko.

Ereagan egindakoa GKEak "Zoritxarreko plastikoa" lelopean abiatutako kanpainaren ekitaldietako bat da. Jardunaldiaren helburuagaz bat egin dute Ekologistak Martxan elkarteak, Lurgaia Fundazioak, Nasti de Plastic Bizkaiak eta Surfriderrek. Horrez gain, Jon Kortajarena Bilboko aktorearea ere izan da bertan, ekimenaren sustatzaileetako bat baita.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun