Barikuan ekingo dio Getxoko Udalak 2020ko aurrekontu parte-hartzaileen bigarren faseari

Martxoaren 22tik apirilaren 4ra bitartean gauzatuko du Udalak 2020ko aurrekontu parte-hartzaileen bigarren fasea. Herritarrek urtarrilean onartutako zortzi proiektuak baloratu eta puntuatu ahalko dituzte.

Areetako geltokiko plaza hobetzea, haurrentzako parke bat estaltzea, Algortako metroko plazako lurrazpiko sarrera egokitzea edo Portu Zaharreko zelaigunea hobetzea dira, besteak beste, herritarrek hautatu beharko dituzten proiektuak.

Aurrekontu parte-hartzaileekaz lotutako proiektuak gauzatzeko Udalak gehienez milioi bat euroko partida aurreikusi du.

Parte hartu nahi izanez gero, botoa emateko aukera egongo da Herritarren Arretarako Bulegoetan (HAB) eta Andra Mari, Gobela eta Fadurako kiroldegietan eskura ipiniko diren kutxetan. Proposamenak (eskaneatutako eranskin gisa) bidali ahalko dira gobernuirekia@getxo.eus helbidera. Udal webgunean erabilgarri dagoen inprimaki digitala beteta ere (www.getxo.eus/gobiernoabierto) parte-hartzeko aukera dago.