Kultura  Getxo 2019-03-25 11:31

Marika Vila komikigile bartzelonarra omenduko dute Getxoko Komiki Azokan

Kerman Santiago Alkorta

Marika Vila komikigile, ilustratzaile eta ikertzaileari egingo diote omenaldia Getxoko Komiki Azokaren 18. edizioan. Vila komiki feministaren adierazgarri nagusienetarikoa da. Gainera, Bilboko Joker liburu-denda ere omenduko dute.

Marika Vila komikigile bartzelonarra omenduko dute Getxoko Komiki Azokan
Marika Vila, haren estudioan. MARIKA VILA | Ikusi handiago | Argazki originala

Marika Vilak (Bartzelona, 1949) emakumearen eskubideen aldeko apustua egin du komikiak idazteari ekin zionetik, 70eko hamarkadan. Suediako, Erresuma Batuko eta Italiako argitaletxeentzat egin du lan, besteak beste. Espainian ere zenbait hedabidetan kaleratu dituzte haren argitalpenak; Interviú-n, El Jueves-en, El País-en eta La Vanguardia-n, kasu.

Idatzi ez ezik, komikiaren lengoaia eta genero-analisiaren inguruan ere ikertu du. Generoko kultura-identitateen sormen eta irudikapenean doktorea ere bada, eta 1976. urtetik emakumeek gizartean, hezkuntzan eta komunikabideetan duten rolen gaineko hainbat gogoeta-eremutan hartu du parte.

Getxoko Komiki Azoka Areetako geltokiko plazako karpan eta Romo Kultur Etxean egingo dute, urriaren 18tik 20ra.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa