Gerraontzia ikusteko ilara Arriluzen Gurutze Gorria dagoen posturaino luzatu da egun bietan. Gainera, auto-ilarak eta aparkatzeko zailtasunak egon dira Kirol Portuan.
Ongi Etorri Errefuxiatuak plataformak eta hainbat eragile antimilitaristak protesta egin zuten zapatu goizean, gerraontziaren aurrean. 200 bat lagunek hartu zuten parte mobilizazioan. OEEren esanetan, "bisita hau onartezina da, eta gure arbuiorik tinkoena adierazten diogu, bai gerra erakuskeria honi, bai herri urrunetako gerrekin aberasteko egiten den armen fabrikazio eta salerosketari".
Joan den astean, Getxoko Udaleko Bozeramaleen Batzordeak bere desadostasuna agertu zuen gerraontziaren presentziagaz, PP eta Ciudadanos Herritarrak-en kontrako botoakaz. Ciudadanosek prentsa-ohar baten bidez txalotu du Juan Carlos I Getxora etorri izana, eta arbuiatu egin du Bozeramaleen Batzordeak hartutako erabakia. Bereziki kritikatu dute PSEren jarrera, "nazionalista eta populistakaz bat eginda Espainiako Armadaren ontzi nagusia nazio-lurraldean egotearen aurka agertuz; Espainian agintea eurek dutela eta Defentsa Ministerioa eurek zuzentzen dutela gogoratu behar lukete".