Kultura  Getxo 2019-05-03 12:30

Afrika Bibangek eta Esne Beltzak kontzertua emango dute bihar, Ereagan

Kerman Santiago Alkorta

Afrika Bibang kantari getxoztarrak eta Esne Beltzak doako kontzertua eskainiko dute bihar, hilak 4, Ereagan. Bibangek 21:00etan hasiko du emanaldia, eta 23:00etan Xabi Solano eta gainerakoen txanda izango da.

Afrika Bibangek eta Esne Beltzak kontzertua emango dute bihar, Ereagan
© AFRIKA BIBANG | Ikusi handiago | Argazki originala

Urtero antolatzen ditu kontzertu bi Getxoko Udalak maiatzeko lehenengo aste-akabuan. Aurten, etxeko artista baten aldeko apustu egin dute. Bibang Ekuatore Guineako etorkinen alaba da, algortarra eta euskalduna. AEKn euskara ikasteari ekin zion hamalau urte zituela, eta gaur egun euskaraz eta gazteleraz abesten du. “Ke No Falte” eta “Etsaiak” taldeetan aritu da abeslari bezala, besteak beste; eta Fermin Muguruzarekin ere ibili da lanean. Rhythm and blues, musika elektronikoa eta hip hop estiloak lantzen ditu batez ere.

Abeslari getxoztarraren ostean, Esne Beltzak eskainiko du zuzenekoa; reggae-a, rock-a eta hip hop-a trikitixaren erritmo tradizionalekaz uztartzen dituen lana aurkeztuko du hamarkoteak: “Ni” (2018). Hamar abestiz jositako disko honek zenbait maitasun-letra biltzen dituen arren, gizarte kezkak ez ditu alboratzen.

Kontzertua igogailua dagoen parkingaren aurrean izango da, eta 21:00etan hasiko dira emanaldiak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa