Berbodromoan parte hartzeko izen-ematea zabaldu dute

Berbodromoa Algortan, artxiboko irudian.

Berbodromoa euskaraz elkartzeko gunearen VIII. edizioa egingo dute maiatzaren 23an, eguenean. Egizu elkarteak antolatuta, hiru hitzordu izango ditu saioak. Goizeko biak, Algortako San Nikolas plazan izango dira, 09:00etan eta 11:00etan. Hirugarrena, aldiz, Itzubaltzeta/Romoko Aurrezki Kutxa kalean izango da, 19:00etan.

Berbodromoan parte hartu nahi duten pertsonek izena eman behar dute hemen.

Saio horren helburuak dira, besteak beste, euskara kalera ateratzea eta bere erabilera indartzea, euskara ikasten ari dena euskaraz hitz egitera animatzea eta euskaraz aritzeko aukera gutxi dituenari aukera horiek ematea. Horretarako, aulkiak jarriko dira kalean eta bost lagunek osaturiko taldeak egongo dira, dinamizatzaile bat eta beste lau pertsona (ahobizi eta belarriprest, euskara dakien jendea euskara ikasten ari denagaz elkartuta).

Taldeko partaideak ordu beteko tartean arituko dira berriketa lasaian, hurrengo hiru gairi buruz:

  • Pentsioak: Kezkatuta zaude gaiagatik? Lana bizitzeko ala bizi lan egiteko?
  • Sentimenduak adierazi: Sentimenduak adieraztera ohituta zaude?
  • Zaintza: Gurasoak seme-alabak ezin zaindu. Gure nagusiekin zer? Ordainduta egon beharko lirateke lanak?