Jendartea  Getxo 2019-05-14 08:32

Azken eraso matxistak salatu dituzte Getxon

Iker Rincon Moreno

Getxo udalerrian asteotan jazotako eraso matxistak salatzeko mobilizazioa egin zuen atzo, astelehenean, mugimendu feministak. "Nazkatuta gaude!" oihuen artean, indarkeria matxista eta adin txikikoen kontrako erasoak salatu zituzten dozenaka lagunek Algortako erdigunean.

Azken eraso matxistak salatu dituzte Getxon
Dozenaka lagun bildu ziren astelehenean azken indarkeria matxistak salatzeko. | Ikusi handiago | Argazki originala

Getxoko mugimendu feministak deitoratu duenez, "etengabeko indarkeria matxista" bizi izan da udalerrian azken asteotan: "Azken gertakari horiek aditzera ematen digute egiturazko sistema kapitalista heteropatriarkalaren indarkeriak inoiz baino biziago dirauela gure gorputzak bortxatzen, gu erabiltzen".

Horren aurrean, "egiturazko eta sistematikoa den" indarkeria hori normalizatzeko prest ez daudela iragarri zuten: "Ez gaude prest gure aurkako biolentziari men egiteko". Era berean, elkartasuna helarazi gura izan zieten indarkeria matxista jasan duten emakumeei, haurrei eta beren familiei: "guk sinisten dizuegu!".

Azkenengo eraso matxistak Getxon

Maiatzaren hasiera gordina izan da Getxon. Izan ere, indarkeria matxistak gogor kolpatu du udalerrian. Alde batetik, hilaren 4an, gizon bat atxilotu zuen Udaltzaingoak bere bikotekideari mehatxuak eta kalteak eragitea egotzita; kasu horretan, emakumea Gurutzetako ospitalera eraman behar izan zuten. Bestetik, hilaren 9an, eguenean, Ertzaintzak 44 urteko gizon bat atxilotu zuen Getxon, adin txikiko bi senideri sexu-abusuak eta sexu-erasoak egitea leporatuta. Izapideak amaitutakoan, atxilotua epaitegiaren esku gelditu zen eta epaileak espetxeratzea agindu zuen.

Azkenengo kasu horretan, emakume batek salaketa aurkeztu zuen maiatzaren 2an Ertzaintzaren aurrean. Horren arabera, senide bat adin txikiko bere alabari sexu-abusuak egiten ari zitzaion. Gainera, ikerketan jakin ahal izan denez, gaur egun adinez nagusi den salatzailearen beste alaba bat ere atxilotutako gizonaren biktima izan zen. Hala ere, mehatxuak tarteko, gertatutakoa ez zioten inori kontatu orduko hartan, iturriek jakinarazi dutenez.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa