Euskararen erabilera areagotzeko Berbodromoak egingo dituzte gaur eta bihar Getxon

Berbodromoa Algortan, artxiboko irudian.

Getxo udalerrian eta Euskal Herritik kanpo dauden kideen arteko bideokonferentzia bidezko euskarazko elkarrizketak egitea ahalbideratuko du lehenengo aldiz Berbodromo Digitala izeneko ekimenak, gaur, 19:00etan, Romo Kultur Etxean. Bihar, eguenean, aldiz, ohiko Berbodromo saioak egingo dituzte Algortan eta Itzubaltzeta/Romon.

Ekimen hori Berbodromoa euskaraz elkartzeko gunearen VIII. edizioaren barruan kokatzen da, Egizu elkarteak antolatuta, Getxoko Udala, Bizarra Lepoan eta udalerriko euskaltegiakaz batera. Era berean, bihar, eguenean, ohiko formatuzko Berbodromoa egingo dute baita ere, eta aurtengo gaiak "pentsioak", "sentimenduak erakustea" eta "zaintza" izango dira. Biharko hitzorduak 09:00etan eta 11:00etan Algortako San Nikolas plazan izango dira, eta hirugarrena, 19:00etan Itzubaltzeta/Romoko Aurrezki Kutxa, Gobelondo eta Kalamua kaleen artean. Egunari amaiera emateko kantu bira izango da.

Ekimenaren helburuak dira, besteak beste, euskara kalera ateratzea eta bere erabilera indartzea, euskara ikasten ari dena euskaraz hitz egitera animatzea eta euskaraz aritzeko aukera gutxi dituenari aukera horiek ematea.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun