Microsoften izenean egindako 8 iruzur informatiko atzeman dituzte Getxon

Artxiboko irudia.

Zortzi lagunek salatu dute azken egunotan Getxon iruzur mota hori jaso izana. Eusko Jaurlaritzako Segurtasun Sailak jakinarazi duenez, iruzurgile informatikoek biktimen ordenagailuetan sartzen dira engainuen bidez.

Microsoft enpresa teknologikoaren dei faltsuaren iruzurra atzeman du Ertzaintzak Getxon. Polizia iturriek jakinarazi dutenez, zortzi lagunek salatu dute udalerri horretan iruzur mota hori jaso izana. Urte honetan zehar, gainera, mota horretako 60 salaketa jaso dituzte EAEn.

Iruzurgileek telefonoz dei egiten diete biktimei euren burua Microsofteko langileak izango balira bezala, eta hainbat engainuren bidez, horien ordenagailuen sisteman sartzea lortzen dute. Ondoren, inolako baimenik gabe, biktimen datu pertsonalak zein bankukoak atzitu eta hainbatetan diru kopuru handiak lapurtu izan dituzte.

Mota horretako enpresa informatiko edo teknologikoen deiren bat jasotzekotan ez fidatzeko ohartarazi du Ertzaintzak, enpresa horiek normalean ez baitiete erabiltzaileei deitzen gorabehera mota horiek konpontzeko. Gainera, datu pertsonalak telefono bidez inola ere ez emateko gomendatzen dute.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun