Beste urte batez, itsas hondoaren garbiketa antolatu dute Getxon Itsas Zaindarien Sareko urpekariek. Oraingoan, Arrigunagako hondartzan egingo dute ekimena, zapatuan, hilaren 15ean, 11:00etatik aurrera. Garbiketa Marefondum elkarteak antolatu du, Getxoko Udalaren laguntzagaz.
Urpekarien taldeak pertsona boluntarioen laguntza izango du lehorrean, eta horregatik udalerriko bizilagunak bultzatu gura dituzte ekimenean parte har dezaten.
Helburua da hiritarrak sentsibilizatzea, pertsonen jarduerak kostaldean, ozeanoetan, aintzira eta ibaietan dituen ondorioen inguruan. Itsaso eta ozeanoetara iristen diren hondakin solidoek (%80ak kontinentean du jatorria) kalte egiten diete urpeko ekosistemei eta urtero milioi bat hegazti bano gehiagoren eta ehun mila dortoka eta ugaztunen heriotza eragiten dute.
Ekologia ekintza horri buruzko argibide gehiago jasotzeko marefondum@gmail.com helbidearen bitartez harremanetan jar daiteke.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
