Barikutik zapatura bitarteko goizaldean, San Inazio jaiak hasi baino ordu gutxi lehenago Algortako txosna bitan egindako lapurreta gogor gaitzetsi dute hainbat elkarte eta eragilek. Lapurrek 200 botila baino gehiago eroan zituzten; daborduko pertsona bat atxilotu dute egileetako bat izan daitekeelakoan.
Sare sozialetan zabalkunde handia izan duen irudi batean ikusten da lapurreta egin duten txosnetako batetik motxila bategaz irteten den gizon bat; itxuraz, horixe da atxilotutakoa. Zehazki, Algortatik Hanka kolektiboak eta Abian Kultur Elkarteak ipinitako txosnetatik eroan zituzten botilak. Gertakaria salatzeko zabaldu duten idatzian, herri-elkarteek diote lapurrek herri-proiektuak jorratzen dituzten taldeei, eta, honenbestez, "herriari" lapurtu diotela, baita talde horien urte osoko proiektuak kolokan ipini ere.
Azkenik, herritarrei babesa eta elkartasuna eskatu dizkiete. "Txosnak arriskuan egoteak jai herrikoiak arriskuan egotea dakar", gehitu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
