Udako jaiak 2019

Pijaman eta aire zabalean, marmitakoa kozinatzeko plaza

Kuadrilla artean marmitakoa, eta beste gauzaren bat ere, prestatzeko hitzordua da Portu Zaharreko azken eguna.

Askotariko koloredun pijama xelebreak jantzita, edo lo egiteko tradizionalagoak diren arropak soinean, ohikoa bilakatu da Portu Zaharrean marmitakoa kozinatzea lagunartean. Auzo horretako jaien azkenengo egunean izaten da horretarako hitzordua; aurten, abuztuaren 14an, eguaztenagaz. Hala, urtero legez, ehunaka lagunek Portu Zahar osoa hartuko dute Bizkaiko arrantzaleek aspaldi asmatutako platerik onena egiten saiatzeko; Algortakoak ez ezik, Euskal Herriko askotariko txokoetatik hurbildu ohi dira hitzordu gastronomiko horretan parte hartzera. Izan ere, kuadrillan batu eta hegaluzearen zapore gozoaz gozatzeko aukera izateaz gainera, ospe handiko txapelketa gastronomiko bilakatu da egun hori.

Kuadrilla eta parte-hartzaile bakoitzak badu bere sekretua marmitakoa egiteko; hala ere, oraingoan Getxoko Udalak Portu Zaharreko errezeten inguruan 2016an kaleratutako liburuan agertzen dena ekarriko dugu orriotara. Ana Sagastik emandako errezeta da hori, haren amama María Ugartek prestatzen zuen bezalaxe. Goazen bada!

Osagaiak: Kipula, tomate bi, piper berde bat, piper txorizero bi, baratxuri zati bi, hegaluze kilo erdi, patata kilo bat, olioa eta gatza.

Hasteko, kazola batean tipula eta piperrak zati txikietan txikituta eta berakatza orri meheetan ebakita ipiniko ditugu. Barazkiok sueztituta daudenean, tomateak zatietan moztu eta aurrekoari gehituko diogu apurka-apurka erregosteko; segituan, ura gehituko diogu, gutxika, gehiegi ez lehortzeko.

Barazki horiek ondo eginda daudela ikusten dugunean, puregailutik pasako ditugu eta aterako den saltsan aurrez zatitutako patatak gehitu beharko ditugu. Adi! Patatak aiztoaren laguntzaz puskatu behar dira, ez osorik moztu! Nahasketa osoa ur beroaz (arrain saldaz bada, hobe) estali, olioa eta gatza geure gustura bota eta patatak ondo eginda egon arte irakiten utziko dugu. Denbora hori patata-motaren araberakoa izango da. Patatak ondo eginda daudela ziurtatzen dugunean, lehenagotik garbitutako hegaluze zatiak sartuko ditugu, azken unean. Kazola estali eta sua itzaliko dugu, beroak berak egosiko du hegaluzea eta bost minutuan zerbitzatzeko prest izango dugu marmitakoa.

Errezeta asko dago plater hori kozinatzeko; batzuek azenarioa ere erabiltzen dute salda egiteko, beste batzuek ardo zuria gehitzen diote, baita pimentoi gozoa ere. Hala ere, den-denak baliozkoak dira itsasoaren zaporea duen hegaluzedun mokadu preziatua egiteko. Ikusiko duzuenez, aukera asko dago, betiere hegaluzea eta patatak oinarri hartuta. Ez galdu aukera eta hurbildu Algortako Portu Zaharrera abuztuaren 14an zuen bertsioa prestatzeko eta lehiaketan parte hartzeko, pijaman jantzita, noski!

Erlazionatuak

Bost eguneko festak izango dituzte aurten Algortako Portu Zaharrean

Getxo

Abuztuaren 10ean hasiko dira Algortako Portu Zaharreko jaiak, suziria botatzean eta nagusien-kuadrillen jaitsiera egitean. Hurrengo egunean eging...