Areetako Xake plazan izango dira saio nagusiak. Bertan ere, gobernuz kanpoko erakundeen eta askotariko elkarteen postuak bilduko dituen Gune Solidarioa kokatuko da eta, Ibaiondo kalean, Munduko Eskulanen Azoka. Azkenik, Itzubaltzeta/Romoko Santa Eugenia plazan, Munduko Terrazan, gaueko saioak (23:00) eta familiarentzako jarduerak izango dira.
The Naghash Ensemble taldeak emango die hasiera saio nagusiei irailaren 5ean, eguenean. Ahots eta musika-tresna zaharrak uztartzen dituen talde armeniar horrek XV. Mendeko poemak berreskuratu eta musika jarri die “Songs of Exile” izeneko proiektua sortuta. Bere saioan, Alos Quartet euskal taldeak ere parte hartuko du gonbidatu gisa. Hurrengo egunean, barikuan, Marta Gómez kantautore kolonbiarra jardungo da Ramón Ruibal musikari cadiztarragaz elkarlanean. Hirugarren egunean, irailaren 7an, Mariza fado-abeslari famatua jardungo da eta, domekan, Skerryvore talde eskoziar gazteak itxiko ditu ordainezko kontzertuen egitaraua bere folk-rock doinuakaz.
Arrastiko kontzertuetan ere jaialdiak askotariko eskaintza hartuko du. Eguenean, Alos Quartet (18:00) harizko instrumentuen taldeak “Lau” bere azken lana aurkeztuko du lehenengo aldiz. Biharamunean, barikuan, cuatro musika tresna izango da protagonista, C4 Tríoren eskumenez. Aste-akabuan, zaleek Gwennyn (zapatua, 19:00) folk bretoiaren ahots bikainaz eta McOnak (domeka, 18:00) euskal taldearen jai-doinuez gozatzeko aukera izango dute.
Azkenik, Munduko Terrazako saioetan (23:00), Masiompa talde getxoztarraren fusio-soinuak izango dira protagonista barikuan eta, zapatuan, Ugandan Sticks & Tambores de Ruanda taldeak Afrikako erritmo eta dantza tradizionalak gerturatuko ditu Getxora. Ohi bezala, familiarentzako jarduerak ez dira faltako jaialdian; barikuan, “Honolulu” musika-ikuskizuna izango da eta biharamunean, zapatuan, Ukedada izeneko ukeleke tailerra-topaketa. Azkenik Eskozia, Frantzia, Nafarroa eta Bizkaiko bandak ibiliko dira Areetako kaleetan zehar 19:30etik aurrera. Barikuan, desfilea 20:30ean hasiko da.