Euskaraz ikasteko askotariko aukerak daude Getxon

Aurten ere, mintzapraktika egiteko Berbalaguna ekimena jarriko du martxan Egizu elkarteak.

Hasiko den ikasturtean euskara ikastera animatzea da, beste urte batez, Getxoko euskaltegietan matrikulatzeko kanpainaren helburua. Aurtengo lema "Getxoko euskaltegietan zure euskara hobetzen ere lagunduko dizugu!" da, eta, urtero legez, irailean zehar zabalik egongo da izena emateko epea.

Euskara ezagutu, ikasi eta hobetu gura duten 16 urtetik gorakoek aukera handia izango dute udal, Lauaxeta AEK, Jose Antonio Agirre ta Lekube eta Bai&By euskaltegietan, maila guztietako ohiko ikastaroakaz batera, honako hauek ere izango dira: modulu txikiak, tituluak ateratzeko prestakuntza, autoikaskuntza, mintzatzeko klaseak edo plazerrez ikasteko saioak, presiorik gabe. 6 eta 15 urte bitartekoentzat Algortako Inguma Umeen Euskaltegiak eta Areetako Uztarri Umeen Euskaltegiak eskaintzen dituzte ikastaroak.

Dendarientzako eta ostalarientzako ere tailerrak egongo dira, eta etorkinentzat eta seme-alabakaz euskaraz egin gura duten gurasoentzat ere. Egizu elkartearen eskutik, Berbalaguna ekimena, euskaraz berba egiteko ohitura dutenak eta mintzapraktika egin gura dutenak biltzen dituen programa ere abian egongo da.  

Diru-laguntzak

Udalak euskara ikasteko diru-laguntzak (44.000 euro) emango ditu aurten ere, baita Bizkaiko Foru Aldundiak (www.bizkaia.eus/euskaratxartela) eta HABEk (http://www.habe.euskadi.eus) ere. Informazioa: www.getxo.eus/eu/euskara udal webgunean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun