Urriaren 25etik 27ra bitartean izango da GetxoExpress lehiaketa

Parte-hartzaileek 42 ordu izango dituzte bideoak grabatzeko eta editatzeko.

Zabalik dago GetxoExpress Film Laburren Lehiaketan parte hartzeko izena emateko epea, irailaren 27ra arte. Sariketa urriaren 25-27ko aste-akabuan izango da, Algortako Muxikebarri Zentroan. Denera 25 parte-hartzaile onartuko dituzte.

Lehiaketan, parte-hartzaileek film labur bat grabatu eta editatu beharko dute 42 orduko epean. Parte hartu ahal izateko adinari dagokionez, ez dago mugarik.

Lehiaketa urriaren 25ean hasiko da, 18:00etan, parte-hartzaileei film laburretan jorratu beharreko gaia emanez. Hortik aurrera, taldeek aipatutako denbora, 42 ordu, izango dute euren lanak asmatu, grabatu eta ekoizteko.

Film laburren proiekzioa egun bi geroago egingo da, hilaren 27an, domekan, 18:00etan ere bai; sarrera dohainik izango da. GetxoExpress-ek 1.000 eurogaz sarituko du film laburrik onena, eta 800 eurogaz bigarrena. Horrez gainera, ikus-entzuleek 300 euroko hirugarren sari bat emango dute.