Romo eskolako umeentzako patioa konpon dezatela eskatu dute

Atzoko elkarretaratzearen irudia. © GETXOKO EH BILDU

Itzubaltzeta/Romoko eskola publikoko hainbat gurasok protesta egin zuten atzo ikastetxe horretako haur-hezkuntzako umeek erabiltzen duten patioa konpon dezatela eskatzeko.

Romoko elizaren arkupetan egindako elkarretaratzean banatutako esku-orrietan azaldutakoaren arabera, haur-hezkuntzako patioaren egoera "tamalgarria" da, "kulunkak apurtuta zeudenean baino egoera okerragoan dago gaur egun". Diotenez, 210 ume inguruk erabiltzen duten gune hori "goibela" da, porlanez inguratutakoa,  eta "hainbat irakaslek zainduta egon behar dute, eskolako beste patioetatik ihes egin ez dezaten". Era berean, gurasoak arduratuta daude umeen jolasteko eskubideaz, hainbat hilabetez gune horrek ez dielako umeei jolasteko aukerarik ematen.

Kexa hori helarazi zioten Getxoko Udalari aspaldi, baina gobernu-taldeak emandako erantzuna izan da obrak "epe barruan" hasi direla, gurasoek jakinarazpenaren arabera. Hala ere, haur-hezkuntzako patioa "ahalik eta lasterren" konpon dezatela eskatu diote gobernu-taldeari. Era berean, Amaia Agirre alkateari bilera bat egiteko eskatu diote, "patioaren egoera zuzen-zuzenean ikus dezan". Oraindino "inolako" erantzunik jaso ez dutela deitoratu dute gurasoek.

Getxoko Udalak HIRUKAri jakinarazi dionez, ikastetxeko eta AMPA Gurasoen Elkarteko ordezkariakaz bilduko da datorren astean, "Romo ikastetxearen jarduketa-plana zehazteko; izan ere, plan hori atzeratu egin da". Batzarran, gainera,  "beharrezkoak diren azalpenak" emango dituzte.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun