Getxoko Udaltzaingoak gizon bat atxilotu zuen atzo, eguaztenean, emazteari laban handi batez mehatxua egiteagatik. Iturriek azaldu dutenez, erasoa etxebizitzaren barruan izan zen, "bien arteko liskar baten ondoren".
Udaltzaingoak telefono-dei bat jaso zuen 13:00ak aldera, bertan emakume batek negarrez laguntza behar zuela jakinarazten zuen, zergatia zehaztu gabe. Agenteak etxebizitzara joan ziren eta salatzaileagaz harremanetan jarri ziren. Horrek jakinarazi zien senarrak laban handi batez mehatxu egin ziola eta, alaba aurrean zegoela, hark esku hartu behar izan zuela lesiorik izan ez zezan. Hori gertatu ostean gizonak alde egin zuen etxetik.
Handik minutu batzuetara, patruila batek etxebizitzatik gertu dagoen apustu-establezimendu batean aurkitu zuen gizona. Une horretan atxilotu zuten, eta, ondoren, epailearen esku utzi ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
