Halíř Trío taldeak Neguko Bidaia musika-zikloa itxiko du

Halír Trío taldea. © WEB UDL

Zapatuan, otsailaren 22an, amaituko da Neguko Bidaia zikloaren XII. edizioa. Halíř Trío ganbera talde ospetsuaren emanaldia izango da ziklo honetako azkena, 19:30ean, Areetako Andrés Isasi Musika Eskolan, eta sarreraren prezioa 5 eurokoa izango da (3€ ikastetxeko ikasleentzat).

Nazioartean ezaguna den Halíř Trío hirukotea honakoek osatzen dute: Eduardo García Salas (biolina), Jana Podolská (cello) eta Václav Mácha (pianoa). Hirurak ere nazioarteko interprete-lehiaketetan saritutakoak dira. Taldea 2016an sortu zen Karel Halíiz (Vrchlabí 1859-Berlin 1909) biolin-jotzaile birtuoso txekiarraren figura ezagutarazteko, zeina, herrialdeko ondare historiko musikalaren parte izateaz gain, munduko biolin-jotzailerik onenetakoa baita askoren ustez.