Txosnak aisialdi-ekimenak izango ditu urriaren 31ra arte, getxoztarrei zein kanpokoei zuzendutakoak. Besteak beste, kirolak, musika eta ur-jarduerak antolatuko dituzte bertan. Enpresa esleipendunak 2022ra arte izango du gunearen kontzesioa, beste denboraldi baterako luzatzeko aukeragaz. Era berean, luzapen bi gehiago egiteko aukera egongo da.
Txosna berria zurezko materialez egingo dute. Egitura nagusia 25 metro koadroko modulu aurrefabrikatua izango da, eta 45 metro koadroko terraza izango du. Udalaren esanetan, inguruagaz bat datorren diseinua izango du, Bali uharteko eraikinetan oinarritutakoa.
Bai instalazioa bai bertan egingo diren jarduerak bat etorriko dira ingurumena errespetatzeko eta natur guneak arrazionalki erabiltzeko irizpideakaz. Sustatzaileen esanetan, Bandera Urdinaren arauak beteko dira, baita beste kalitate-estandar orokor batzuk ere. Horrez gain, "Itsasertza kontserbatzeko jardunbide egokien dekalogoa" programari atxikita egingo da txosna.
Ostalaritza-zerbitzuaz gain, Ereagako txosna-guneak doako edota kostu txikiko kirol-jarduerak (freesbie, snorkel, paddle taulak...) eskainiko ditu, baita aisialdirako beste jarduera batzuk ere: paddle SUP eta surf-ikastaroak, hondartzako errugbia, yoga, igeriketa-zeharkaldia...