Getxoko Udaltzaingoak eta Ertzaintzak Itzubaltzeta/Romoko gizon bat identifikatu zuten atzo, domekan, Kresaltzu kaleko BM supermerkatu batean lapurreta egitea egotzita. Inguruko auzokideek delitua grabatu zuten, zuzen-zuzenean; bideo horien arabera, ikus daiteke zelan gizonak hainbat kolpe eman zizkion establezimenduko ateari, hura apurtu ondoren bertan sartu eta hainbat produktugaz alde egiteko
Atzo, domekan, Itzubaltzeta/Romoko Kresaltzu kaleko BM supermerkatu batean lapurreta egin zuen gizonezko batek. Inguruko auzokideek delitua grabatu zuten, zuzen-zuzenean, euren etxeetatik; sare sozialetan bolo-bolo dabiltzan bideo horien arabera, ikus daiteke gizonak hainbat kolpe eman zizkiola establezimenduko ateari, hura apurtu ondoren bertan sartu eta hainbat produktugaz alde egiteko. Dirudienez, gizonezkoak janaria nahi zuen: "Janaria nahi dut eta hau itxita dago", entzun daiteke grabatutako bideoetan.
Lapurreta jazo eta denbora gutxira, Getxoko udaltzainek eta ertzainek ustezko gaizkilea identifikatu zuten, bere etxean, Ertzaintzak jakinarazi duenez. Susmagarria karguakaz aske utzi zuten, epailearen deialdiaren zain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
