Getxophoto 2020

'Pantaila partekatua', konfinamenduko harremanak erretratuen bidez irudikatzeko ekimena

Irailaren 3tik 27ra bitarteko programazioa iragarri du aurtengo Getxophotok, Kalera! goiburuagaz. Gaurkoan, berriz, jasaten ari garen egoeragaz zerikusia duen ekimen bat plazaratu dute jaialdiaren antolatzaileek: Pantaila partekatua. Hartara, gutako askoren bizimoduetan hainbesteko garrantzia hartu duten bideo bidezko elkarrizketetako erretratuak eskatu dizkiete herritarrei.

Hamaika aplikazio eta sareren izenak oso ezagun bihurtu ditu konfinamenduak (batzuk baziren lehenago er); Skype, Zoom, Jitsi, Facetime... "Alarma-egoera honetan horiek guztiak erabiltzen ari gara komunikatzeko eta elkar 'ikusteko', eta bizipen horiei ikusgaitasuna eman nahi diegu, Jaialdiaren hurrengo edizioan herriaren erdialdeko eraikin batean instalazio bat ipiniz", azaldu dute Getxophotoren antolatzaileek.

Honenbestez, elkarrizketa edo batzar digitaletan hartutako pantaila-irudiak bidaltzeko eskatu diete getxoztarrei. Jasotzen dituzten irudi denak Getxophotoren webgunean ikusbide egongo dira jaialdiak irauten bitartean, eta aukeratutako 30 inguru Urgull kaleko eraikin publiko baten fatxadan paratuko dituzte. Edozein getxoztarrek har dezake parte ekimenean, baina adingabekoek gurasoen baimena beharko dute. 

Argazkiak, edo zehatzago esanda, pantaila-irudiak, online elkarrizketa batean parte hartzen den bitartean egin behar dira, ordenagailuan zein gailu mugikor batean. "Zentratuta eta kamerari begira agertzen bazara hobeto, baina batik bat naturala izan", eskatu dute sustatzaileek. 

Ekainaren 15era arte egongo da aukera irudiak bidaltzeko, getxophoto@gmail.com helbidea. Lotura honetan ikus daitezke parte hartzeko bete beharreko baldintza denak, baita pantaila-irudiak hainbat  sistema operatibo eta gailutan hartzeko argibideak ere.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun