Juan Carlos Borboikoaren bustoa Getxoko osoko bilkuren aretotik kentzea onartu du Udalbatzak

© GETXOKO EH BILDU
EH Bilduren proposamenez, Getxoko Udalbatzak onartu du gaur Juan Carlos I Borboikoaren bustoa Getxoko osoko bilkuren aretotik kentzea. Erabakia EAJ, EH Bildu, Elkarrekin Podemos eta PSE-EE alderdien aldeko botoakaz onartu da; PP proposamenaren kontra agertu da.

Gaurko osoko bilkuran koalizio abertzaleak aurkeztutako mozioan aipatzen denez, "bereziki larriak dira Juan Carlos Borboikoari eragiten dioten ustelkeria kasuak, iruzur fiskala eta diru-zuriketa". Horren harira, joan den martxoaren 3an Suitzako La Tribune de Geneve egunkariak herrialde horretako Fiskaltzak egindako ikerketaren berri eman zuen; horretan, Saudi Arabiako erregeak Juan Carlos Borboikoa erregeari emandako 100 milioi dolarreko dohaintzaren nondik norakoak azaleratu ziren. "Kopuru hori herrialde horretako banku batean sartu zen, Mekara abiadura handiko trena eramateko kontratuaren bitartekaritza-lanengatik", gogoratu du EH Bilduk gaur irakurritako mozioan.

"Duela gutxi, Espainiako ustelkeriaren aurkako Fiskaltzak ere Auzitegi Gorenera igorri ditu Juan Carlos Borboikoa forudun izateagatik obra hori gauzatzean nazioarteko transakzioetan izandako ustezko ustelkeria-delitu bati buruzko eginbideak", azpimarratu du koalizio abertzaleak. Horregatik denagatik, EH Bilduk Espainiako erregea zenaren bustoa udaletxeko udalbatza-aretotik kentzea proposatu du, baita osoko bilkurak onartu ere, talde denen babesagaz, popularrek izan ezik.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun