Portu Zaharreko hainbat herritarren ekimenez, auzo horretako Etxetxu erakina babestea eta erabilera publikoa ematea eskatzeko sinadura-bilketa hasi da change.org plataformaren bitartez. Urtarriletik "plaza itxita eta eraikina zurkaiztuta" daudela adierazi dute, eta gogorarazi dute joan den astean oinezkoentzako pasabidearen zati bat itxi dutela, eraikina kolapsatzeko arriskua dela eta.
Ekimenaren sustatzaileek Etxetxuren ardura lehenbailehen bereganatzeko eskatzen diote Udalari, "saldutako prezio berean erosiz, edo desjabetuz, gaur egungo ugazabek ez badute eraikina babesten". Horrez gain, Etxetxu berregokitzea gura dute, haren nortasuna errespetatuz. Era berea, erabilera publikoa izan dezala eskatu dute, "Portu Zaharreko bizilagunakaz adostuta".
Azaldu dutenez, eraikina 2017an saldu zen, eta ugazaba berriek proiektu bat aurkeztu zuten goiko solairuan turismo-gune bat sortzeko. "Baina lanak ez dira hasi, eta eraikina gero hondatuago dago".
XVII. mendekoa da Etxetxu. "Besteak beste Udaletxea eta Arrantzaleen Kofradia egon dira bertan, auzokoentzako topagunea izateaz gain", gogorarazi dute orain harentzako babesa eskatzen dabiltzanek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
