Torreneko erakusketa-aretoa kentzeagatik protesta egitera deitu du Artibistak kolektiboak

Torreneko udal-aretoan Herritarren Arretarako Bulegoa dago orain. © GETXOKO UDALA

Algortako Torrene kaleko udal-aretoan, erakusketa egiteko gelaren ordez administrazio-bulegoak ipintzea erabaki zuen Getxoko Udalak orain dela hilabete batzuk. Hori dela eta, joan den uztailean Amaia Agirre alkateari idatzi bat bidali zion Artibistak kolektibo sortu berriak, aldaketaren arrazoiez galdetuz eta Torrenekoaren ordez Romoko Kultur Etxean ipini duten  erakusketa-areto berriak behar bezalako kondiziorik ez duela adieraziz. Datorren eguaztenean elkarretaratzea egingo dute Torreneko bulegoaren aurrean.

"Getxoko artistak oso harrituta gaude, osasun-krisiaren testuinguruan, Udalak Algortako Torrene erakusketa-aretoa itxi eta udal administrazio-bulego batean bihurtu duelako, aldez aurretik abisatu gabe" adierazi zioten alkateari bidalitako gutunean, "ez dugu ulertzen zergatik hartu den erabaki hori kultura-eragileei inolako azalpenik eman gabe".

Artibistak kolektiboa kexatu egin da alkateak emandako erantzuna "laburra" eta "ez oso landua" izan zelako. Zehazki, erantzun horrek dio COVID-19ak eragindako egoeraren ondorioz Udalak herritarrentzako arreta-zerbitzua berrantolatu egin behar izan duela, eta berrantolaketa horren barruan Torreneko bulegoari lehentasuna ematea erabaki zela. Bestalde, Romoko Kultur Etxeko aretoa erakusketak egiteko egokitzat jo zeun Amaia Agirrek, eta erreferentzia bat aipatu zuen, egindakoen zerrenda bat ikusteko.

Artibistek, berriz, Kultur Etxeko aretoa Torrenekoa baino txikiagoa dela azpimarratu dute, eta erakusketak egiteko kondizioak onak ez direla berretsi dute. 

Elkarretaratzea eguaztenean

Hori dela eta, protesta-ekitaldi bat antolatu dute datorren eguaztenerako, irailak 16. Torreneko aretoaren aurrean egingo dute, 12:30ean hasita, eta ekimenagaz bat egin duten hainbat musikariren kantaldia izango da ardatza. Horrez gain, eskualdeko beste artista batzuek ere (33k momentuz) Artibisten aldarrikapenarekiko atxikimendua adierazi dute. 

Ekitaldira arropa beltzez edo magentaz joateko eskatu dute. Esan barik doa osasun-babeserako neurri denak beteko direla. Antolatzaileek eskatu dute joateko asmoa dutenek aldez aurretik ohartarazteko, urruntze sozialari dagokion aldetik ekitaldia ondo prestatu ahal izateko. Horretarako, mezu bat bidali beharko da ortells@ainhoaortells.com posta elektronikoko helbidera.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun