Entitateek Euskaraldira batzeko aukera gehiago izango dituzte datorren astean

Erredakzioa 2020ko ira. 18a, 10:34

Euskararen alde egiteko prest dauden askotariko entitateek parte har dezakete aurten Euskaraldian. Hori dela eta, Getxoko enpresa eta elkarteek egitasmora batzeko beste bultzada bat emango dute datorren astean, irailaren 27an izena emateko azken eguna baita.

Daborduko esparru guztietako 40 bat entitatek (dendak, tabernak, enpresak, erakundeak, elkarteak…) izena eman dute azaroaren 20tik abenduaren 4ra euskararen erabilera sustatzeko izango den hizkuntza-ariketan parte hartzeko. Entitate horiek konpromisoa hartu dute aipatutako egun horietan toki bat
edo batzuk (Ariguneak) egokitzeko bertan euskaraz mintzatu ahal izateko.

Getxoko entitateen izen-emateetan laguntzeko, irailaren 21 eta 22an informazio puntu bi jarriko dituzte Algortako Villamonteko kultur etxean eta Romo Kultur Etxean, 18:00etatik 20:00etara zabalik.

Villamonten 3. gelan.
RKEn 2. solairuko 211 eta 212 geletan.

Entitate gisa parte hartzeko izen-ematea irailaren 27an amaituko da eta hilaren 24an hasiko da norbanakoentzat.

Euskara Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun