Euskaraldia

Getxoko Ariguneak ezagutaraziko dituzte datorren martitzenean

Getxoko Ariguneen berri emateko ekitaldia egingo dute datorren martitzenean, hilaren 29an, Muxikebarri Antzokian, "Badator Euskaraldia! Getxoko Ariguneak ezagutu eta eman izena aurtengo Euskaraldian" titulupean. Bertan, azaroaren 20tik urtarrilaren 4ra bitartean izango den Euskaraldiaren bigarren edizioan euskaraz mintzatzeko guneak (Ariguneak) egokitzeko konpromisoa hartu duten entitate denak aurkeztuko dituzte. Era berean, norbanakoak ekitaldian izena emateko animatuko dituzte.

Paule Loizaga bertsolariak egingo die ondoetorria ekitaldira gerturatuko diren denei, 20:00etan. Aurkezpenaren ondoren, Getxoko Ariguneen kanpainaren bideoa eta izena eman duten entitateen agerraldia ikusi ahal izango dira. Bestalde, Amaia Agirre alkateak, eta Euskaraldiaren sustatzaileek (Egizu eta Bizarra Lepoan elkarteak) entitateen izen-emateari buruzko balantzea eta norbanakoen izen-emate kanpainari buruzko xehetasunak azalduko dituzte.

Ariguneakaz batera, aurreko edizioan bezala, Ahobizi (lehenengo hitza beti euskaraz), Belarriprest (ulertzen duten denakaz uneoro euskaraz), eta Irribizi (euskara ulertu ez arren, euskararen alde) rolak hartuko dira.

Ekitaldirako sarrera doakoa izango da, gonbidapenaren bidez. Horiek Algortako Kultur Etxean eta Romo Kultur Etxean har daitezke.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun