Getxo Kirolakek 75 langileren lanpostuak "arriskuan" jarri dituela salatu du EH Bilduk

Arte martzialen ikastaroa, artxiboko irudian.

Getxo Kirolak erakundeak kirol-ikastaroen eskaintza murriztu, zerbitzu horren kostuak jaitsi eta, ondorioz, 75 pertsonaren lanpostuak "arriskuan" jarri dituela salatu du EH Bildu udal-taldeak. Era berean, deitoratu du behargin horien lan-eskubideetan eragina izan dezakeela neurri horrek, hala nola antzinatasuna galtzea.

Koalizio abertzaleak jakinarazi duenez, Getxo Kirolakek bertan behera utzi du kirol-ikastaroen eskaintza, "gaur egun bizi dugun osasun-egoeran oinarrituta". Hala ere, EH Bilduk gogoratu du inguruko udalerrietan eskaintza bermatu dela, hala nola Sopelan, Leioan, Santurtzin eta Bilbon. Horrez gainera, ikastarook eskaintzen dituzten enpresak kontratatzeko lehiaketetarako deialdirik egin ez dela deitoratu du udal-talde subiranistak. Ondorioz, 75 kirol-begiralek lana galtzeko aukera izan dezaketela azpimarratu du EH Bilduk, "eta litekeena da eragiten dieten lan-eskubideak galtzea, hala nola antzinatasuna edo subrogazio-eskubidea. Izan ere, Getxo Kirolakeko Kontseilu Errektorean, irailaren 21ean, EAJk eta PSEk igeriketa ikastaroei eusten zien kontratua behin betiko etetea erabaki zuten. Bozketa horretan PP abstenitu egin zen eta EH Bilduk eta Elkarrekin Podemosek bakarrik erakutsi zuten langileekiko konpromisoa".

Osasun-egoerak baldintzatuta

EH Bilduk azaldu duenaren arabera, Getxo Kirolakeko presidenteak adierazi du osasun-egoera aldatzen bada ikastaroak eskaintzeko modua bilatzeko asmoa dagoela. Hala ere, baieztapen horrek 75 kirol-monitoreen egoerarekiko erabateko mespretxua ezkutatu egiten duela salatu du koalizio abertzaleak; "izan ere, kontratatzeko moduak eta presako balizko kontratu horren formatuak eragin nabarmena izango du haien lan-eskubideetan, hala nola antzinatasunean, subrogazio-eskubidean eta soldatetan. Horrela, zerbitzu horien kontratazioan kontrol eta gardentasun txikiagoa ahalbidetuko litzateke".

Koalizio subiranistak argi utzi gura izan du gaur egungo egoerak ez duela aukerarik ematen ikastaroak aurreko urteetako baldintzetan eskaintzeko eta leku gutxiago eskaini behar direla. Hala ere, azpimarratu du Getxo Kirolakek badituela instalazioak eta profesionalak ikastaroen eskaintza osasun-egoerara egokitu dezaketenak. "Ez dago kirol-ikastaro guztiak bertan behera uzteko justifikaziorik".

EH Bilduren ustetan, zerbitzu-murrizketa bat eta kirol-ikastaroen kostuak merkatzeko eragiketa bat gertatzen ari da, "etorkizunean Getxo Kirolak kirol-ikastaroetara itzuli ahal izateko baldintzak sortuz, aurreko soldatak errespetatzeko betebeharrik izan gabe, eta enpresa lizitatzaileak langileak subrogatzeko betebeharretik askatuz".

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun