Satistegiko begiratokia eraitsiko dute ingurua urbanizatzeko obretan

Satistegiko begiratokia, artxiboko irudia.

Atzo, astelehenean, abiatu zituzten Satistegi eta Chopos parkea mantentzeko eta urbanizatzeko lanak. Beharrok 47 aste irautea aurreikusi dute, 1,6 milioi euroko aurrekontuagaz. Asteon Ereagako kaiko bidegorria, "La Rana" izeneko iturriaren eta Portu Zaharraren amaieraren arteko zatian, hesituko da erabiltzaileak babesteko, obrek inguruko magalean eragina izan baitezakete.

Behin hesia amaituta, Satistegi kaleko 7-9 zenbakiko begiratokian hasiko dira lanak. Segurtasun eta Osasun Planean jasotako babes-neurriak hartu ondoren, begiratoki hori eraitsiko da. Lanek dirauten bitartean, oinezkoentzako eta ibilgailuentzako bidea moztuko dute Ereagako kaian. Mozketa hori behar bezala iragarriko zaie Portu Zaharreko oinezkoei zein bizilagunei.

Proiektua, horma mikropilotatuaren sistema bidez garatuko da, Satistegiko bidean, eta ainguraketa berrien bidez Chopos parkean, kale horretako bidea oinarritzen den mendi-hegalaren segurtasuna eta egonkortasuna hobetzeko; eta, horrekin batera, gainerako egiturena ere, Chopos parkea esaterako. 12.000 metro koadroko azalera du eremu horrek eta Ereagako kairaino jaisten da.

Proiektuak, halaber, eremu hori berriro urbanizatzea aurreikusten du, bide publikoa zolatzea eta azpiegitura-sareak (saneamendua, hornidura eta argiteria) berrantolatzea barne.

Obrek irauten duten bitartean, bizilagunei ahalik eta eragozpen gutxien eragiteko bitartekoak jarriko dira. Gainera, begiratokiraino pasabide bat jarriko da oinezkoentzat, 7 eta 9 zenbakietako atarietara sarbidea errazteko, eta larrialdietako ibilgailuentzat.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun