Martitzenean hasiko dira Getxoko Toponimia Ibilbideak

Lehenengo hitzordua urriaren 13an izango da, Portu Zaharrean.

Urriaren 13an, martitzenean, abiatuko dira aurtengo Toponimia Ibilbideak, segurtasun-neurri denak hartuta. Horien bitartez, Getxoko toponimia, historia, kultura eta naturaren nondik norakoak beren-beregi ezagutzeko aukera egongo da. Getxoko Udalaren laguntzagaz Bizarra Lepoan euskara-elkarteak antolatutako ibilbide horiek bizpahiru ordukoak izango dira, doakoak, eta ikastetxe, euskaltegi, elkarte eta norbanako orori zuzenduta daude. Azalpen denak euskaraz izango dira, eta nonork ulertzeko arazorik izango balu, horren mailara egokituko dira azalpenak.

Lehenengo hitzordua urriaren 13an izango da, Portu Zaharreko Etxetxun, Kostaldeko Getxo ibilbidea egiteko; hurrengoa urriaren 15ean, Andra Mariko kiroldegian, Betiko Getxo ibilbidea egiteko; eta azkena, urriaren 27an, Fadura Kiroldegian, Hezeguneak (Getxo Berria) ezagutzera joateko. Hirurak 18:30ean hasiko dira.

Ibilbideetan parte hartzeko aurretiaz izena eman behar da getxo.toponimia@gmail.com helbidean edo 688 635 350 telefono zenbakian.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun