Ia ehun salaketa ipini dituzte aste-akabuan COVID-19agatik ezarritako osasun-neurriak ez errespetatzeagatik

Getxoko Udaltzaingoak 91 pertsona salatu ditu aste-akabu luze honetan maskararik ez eramateagatik, kalean edari alkoholdunak kontsumitzeagatik eta segurtasun tartea errespetatu gabe erretzeagatik. Era berean, ostalaritzako lau lokal salatu ziren ordutegia ez betetzeagatik eta Eusko Jaurlaritzak ezarritako osasun neurriak ez errespetatzeagatik. Gainera, pertsona bat atxilotu dute baimendutako alkohol-tasa boskoiztea egotzita.

Getxoko Udaltzaingoak gidari bat atxilotu zuen joan den zapatuan, hilaren 10ean, goizaldean, Algortan, alkoholaren tasa boskoizteagatik. Herritarren Segurtasunerako arloari atxikitako agenteek, Amezti kalean eta Algorta etorbidean zeudela, kontrako noranzkoan Algorta etorbidetik zetorren ibilgailu batek Amezti kalean aparkatutako ziklomotor baten kontra jo zutela ikusi zuten, iturriek azaldu dutenez. Istripua izandako tokitik alde egiteko gidariaren ahaleginaren ondoren, agenteek ibilgailua geldiarazi zuten.

Gidaria identifikatu egin zuten eta alkoholaren eraginpean zegoelakoan, bide-segurtasunaren aurkako ustezko delitu batengatik atxilotu zuten. Poliziaren bulegoetan beharrezko proba etilometrikoak egin zitzaizkion, eta lehenengo proban 1,17 mg/l eta bigarrenean 1,11 mg/l eman zituen. Horrez gainera, udaltzainek jakin zuten pertsona hori atxilotzeko lau agindu emanak zituztela Malagako eta Bartzelonako epaitegiek;  beraz, epailearen esku jarri zen.

Segurtasun jarduera COVID-19agatik

Bestalde, urriaren 12ko jai-eguna zela eta, Getxoko Udaltzaingoak segurtasun lanak egin zituen segurtasun-neurriak betearazteko. Algortako eta Itzubaltzeta/Romoko aisialdi-guneetan, haurrentzako parkeetan, jolasguneetan eta kostaldeetan hainbat ekintza egin ziren oinez.

Udaltzaingoko Herritarren Segurtasunerako Alorrak nabarmendu du horren helburua dela prebenitzea, informatzea eta agintari eskudunek ezarritako osasun neurriak betetzen direla bermatzea. “Ezin dugu beste aldera begiratu, pertsona batzuk Covid-19aren kontura hiltzen ari direnean; beste batzuk oso gaizki pasatzen ari dira ABEEE (Aldi Baterako Enplegu-Erregulazioko Espedientea) desberdinetara joateagatik, edo langabezian daude, beraien enpresa itxi egin delako. Zero tolerantzia arduragabea den jendearekiko”, gaineratu dute.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun