Jardunaldien azken asteburuko programa barikuan, hilaren 23an, abiatuko da Brodas Bros dantza konpainiaren eskutik. Around the World (21:00etan) bere azken ikuskizuna aurkeztuko dute, era futurista eta aldi berean bihozberan beren bizipenak erakusten dituen lana. Mapping-a, proiekzio interaktiboak, aireko dantza, argiak eta led-jantziak uztartu dituzte egun arte taldeak sortu duen lan teknologikoenean.
Zapatuan, urriaren 24an, eskaintza bikoitza izango da eguneko programan. 13:00etan, Nazioarteko Dantza Eguna ospatuko da. Horretan, bertoko dantza eskola eta akademiek estilo anitzeko koreografiak erakutsiko dituzte: dantza neoklasikoa, garaikidea, flamenkoa, klake, urban dance eta lindy hop, besteak beste. Arratsaldean, 18:00etan, haurrek Pinocchio lanez gozatzeko aukera izango dute, eskarmentu handiko Gorakada taldeak sortu duen Carlo Collodiren ipuin famatuaren bertsioa, hain zuzen ere.
Zikloa borobiltzeko, biharamunean, domekan, bi ikuskizun ere izango dira. 13:00etan, Hika konpainiak Tonbola antzeztuko du, absurdoaren kontzeptua umoreaz eta musikaz baliatuta jorratzen duen duen euskarazko kabaret lana. Azkenik, 19:00etan, Elektrart eta Dantzaz taldek jardunaldiei amaiera emango diete Elektrical Flower ikuskizunagaz. Lan horretan dantzak eta arteak naturarekin dituzten harremanak gerturatuko dizkiote ikusleei eta bidaia poetiko batean parte hartzera eramango diete. Horretan gorputz adierazmenaren plastikotasuna eta arte digitalen piezez sortutako eszenografia bateratu dituzte sortzaileek.