Koronabirusa Uribe Kostan

Kultura sormenerako 120.000 euro banatuko ditu Getxoko Udalak

Kultura sormenerako diru-laguntzak emateko deialdia zabaldu du Getxoko Kultur Etxeak gaur,  urriaren 29an. Ekimena lan artistikoak eta sorkuntza prozesuak garatu gura dituzten Getxoko 18 urtetik gorako pertsona fisikoei zuzenduta dago. Halaber, bertan bizi ez diren pertsonei ere zuzenduta daude, baldin eta Getxori estu lotutako kultura proiektuak aurkezten badituzte.

Deialdi horri 120.000 euroko aurrekontua esleitu zaio, osasun-egoera dela eta bertan behera geratu diren aurtengo herriko jaien baliabide ekonomikoak erabiliz. Ekimen horren bitartez, Udalak baliabide horiek Getxoko kultur sektorea sustatzeko konpromisoari erantzun gura dio.

Guztira, zortzi ataletan banatuko dira diru-laguntzak:

  1. Sorkuntza eszenikoa (antzerkia eta dantza).
  2. Ikus-entzunezko lanak (ikus-entzunezko proiektuak eta zinea).
  3. Musika-konposizioak.
  4. Literatura-lanak.
  5. Ilustrazioa.
  6. Haur eta gazteentzako hezkuntzako proiektu kulturalak.
  7. Obra bisualak eta plastikoak.
  8. Beste sorkuntza diziplina batzuk (aurreko atalen barru ez direnak).

Proiektuak aurkezteko epea azaroaren 30era arte egongo da zabalik. Hori amaitu ondoren, aditu-batzorde batek lanak aztertuko ditu eta, handik hiru hilabetera, gutxi gorabehera, hautatutako proiektuak jakinaraziko dira, baldin eta osasun-egoerak ahalbidetzen badu.

Kultura programazioa eta formakuntza

Deialdia hiru motatako diru-laguntza sorta baten barne dago. Gainerako biak laster abiaraziko ditu Kultur Etxeak, eta horien ardatzak programazio kulturalerako proposamenak eta formakuntza eta profesionalizazioa izango dira, hurrenez hurren.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun