Denera, 109 ale ordeztuko dira (kalean lerrokatzeko 70 eta parkeetan kokatutako 39), gehienetan espezie bereko aleakaz. Bestalde, udalerriko hainbat puntutan 13 arbola landatuko dira. Lan horiek urte amaierara arte edo 2021aren hasierara arte luzatuko dira, eta herritarrentzako ezagunak diren aleei (platanoak, xarmak, astigarrak, akaziak, urkiak, gereziondoak, intxaurrondoak edota ezkiak) eta horren ezagunak ez direnei (lagunariak, gurbeak, ligustrumak, yedonensisak...) eragingo die.
Ordeztutako arbolez gain, Makaleta etorbideko obretan eta Manuel Gainza aparkalekuan udako hilabeteetan landatu ezin izan zirenak landatuko dira. Lehenengo kasuan 53 ale landatuko dira, eta bigarren kasuan 37.
Birjartzearen arrazoiak hainbat dira: denboraleak edo eguraldi txarragaz lotutako faktoreak (bereziki haizeagaz), segurtasunari eta iraganbideari eragiten dietenak zuhaitzak edo adarrak erortzeagatik; bide publikoko ezbeharrak (talkak edo trafiko istripuak); gaixotasunak; zahartasuna; usteltzea, ekintza bandalikoak... Ordezkapen gehienak denboraleek eta ekintza bandalikoek eragindakoak dira.
Hain zuzen ere, lorezaintza eta berdeguneei buruz iaz jasotako 277 abisu, kexa eta iradokizunetatik 186k (%67) zuhaitzekin lotura zuzena zuten; hau da, hirutik bik. Horietatik 121 (%65) iradokizunak izan ziren.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
