Konfinamenduan zuzeneko online kirol-ikastaroen esperientzia aurkeztuko du Getxo Kirolak-ek Urbanbat Fest jaialdian

Getxo Kirolak-ek pasa den udaberrian konfinamenduan egindako zuzeneko online kirol-ikastaroen inguruko esperientzia aurkeztuko du bihar, eguenean, arkitektura, hirigintza eta gizarte-berrikuntzako Urbanbat Fest jaialdian. Ekimen horren aurtengo edizioaren goiburua “Hiria etxe barruan” da, eta COVID-19ak eragindako pandemiaren testuinguruan etxeko eremuan gertatutako eraldaketa eta erabilera berriak aztertuko ditu.

Getxo Kirolakek online kirol-eskolen programaz burututako lana "Etxean ibiltzearen gaineko esperientziak" izeneko jardunaldian aurkeztuko dute, espainiar Estatuko eta Kolonbiako eta AEBtako leku ezberdinetako beste 7 proposamenakaz batera. Besteak beste, honako gai hauek jorratuko dira: adinekoen egoitzetako lana, irisgarritasuna, hiri-birsorkuntza, co-housing eta konfinamendu soziala.

Martxoan, apirilean eta maiatzean egindako lana deskribatuko du erakunde getxoztarrak, global fitness, pilates, haurrentzako kirola, adinekoentzako kirola eta yoga bezalako eskolak eman baitzituen zuzenean. Jarduera-programazio horretan, 4.325 pertsonak parte hartu zuten eta, jardunaldian azalduko den moduan, jarduera fisikoaren eta aisialdi osasungarriaren alternatibak eskaintzeaz gain, adinekoen kasuan teknologia berrietara hurbiltzea eta elkar laguntzeko eta zaintzeko eremu bat sortzea ere lortu zuen.

Esperientzien aurkezpena internet bidez egingo da eta 19:00etan hasiko da. Izen-ematea doakoa da eta web orrialde honetan eska daiteke.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun