Pandemiarik ez bagenu, egunotan irekiko litzateke Galea inguruan olatu erraldoien begira egoteko itxaronaldia, 2021eko martxora arte. Halaxe funtzionatzen baitu Punta Galea Challengek, Europan egiten diren olatu handietako surf-txapelketetan zaharrenak: itsasoaren egoerak ezartzen du egutegia, eta horretara moldatzen dira gizakiak. Oraingoan, ordea, antolatzaileak proba bertan behera uztera behartu ditu beste indar handiago batek.
Getxo Kirolak, Getxo Surf Taldeak, Euskal Herriko Surf Federazioak (zeinak bere egutegi osoa bertan behera utzi duen), staff teknikoak, zuzendaritzak eta txapelketako lehiakideek osatzen dute proba ospetsuaren antolaketa-taldea. Hainbat bilera egin ostean, 2020ko edizioa ez egitea erabaki dute, erakundeek pandemiari aurre egiteko hartutako azken neurriak direla eta.
Izan ere, uhin erraldoien bila nazioartetik etorriko liratekeen surflari batzuek zailtasun handiak izango lituzkete Euskal Herrira ailegatzeko, eta ikusle-kopurua ere nabarmen murriztuko litzateke osasun-segurtasunagatik ezarritako mugen ondorioz. Datorren urtean proba normaltasunez egin ahal izateko itxaropena agertu dute antolatzaileek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
